Hər il ənənəvi olaraq Azərbaycan Bəstəkarlar İttifaqının təşkilatçılığı ilə, İttifaqın sədri, Xalq artisti, professor Firəngiz Əlizadənin bədii rəhbəri olduğu “Şəki İpək Yolu” Beynəlxalq Musiqi Festivalı keçirilir. Bu Festival çərçivəsində  Azərbaycan Respublikası Dövlət Sərhəd Xidmətinin Nümunəvi Hərbi Orkestri  dəfələrlə iştirak etmiş, yüksək peşəkarlıq nümayiş etdirərək, Festivalın qonaqlarının və turistlərin böyük rəğbətini qazanmışdır.  Orkestrin zəngin və maraqlı konsert proqramını Azərbaycan bəstəkarlarının əsərləri ilə yanaşı klassik musiqi nümunələri və gözəl aranjimanlar  bəzəyir. Artıq uzun illərdir Azərbaycan Bəstəkarlar İttifaqının bu kollekriv ilə əməkdaşlığı sayəsində yeni-yeni musiqi əsərləri ərsəyə gəlmişdir.

Milli musiqi mədəniyyətimizin hərbi-vətənpərvərlik istiqamətində inkişaf etdirilməsi sahəsində geniş fəaliyyətinə görə Azərbaycan Bəstəkarlar İttifaqının sədri,  Xalq artisti, professor Firəngiz Əlizadə “Azərbaycan Sərhəd Mühafizəsinin 100 illiyi (1919-2019)” Azərbaycan Respublikasının yubiley medalı ilə təltif edilmişdir. Təqdimat mərasimində iştirak edən Azərbaycan Respublikası Dövlət Sərhəd Xidmətinin Nümunəvi Hərbi Orkestrinin  bədii rəhbəri və dirijoru Səməd Vəkilov medalı təqdim edərək, rəhbərlik etdiyi kollektivin Azərbaycan Bəstəkarlar İttifaqı ilə sıx əməkdaşlığını xüsusi olaraq vurğulamışdır.

F.Əlizadə Azərbaycan Respublikası Dövlət Sərhəd Xidmətinin yüksək etimadını qiymətləndirərək, öz dərin minnətdarlığını bildirmişdir. Bu il Pandemiya səbəbindən “Şəki İpək Yolu” Beynəlxalq Musiqi Festivalının keçirilməsi qeyri-mümkün olsa da,  F.Əlizadə qeyd etmişdir ki, gələcəkdə də Bəstəkarlar İttifaqının orkestr ilə əməkdaşlığı uğurla davam etdiriləcək və bu gözəl kollektivin yeni-yeni çıxışları bizi sevindirəcək.

Azərbaycan Bəstəkarlar İttifaqı XII əsrin dahi Azərbaycan şairi və mütəfəkkiri Nizami Gəncəvinin yaradıcılığına həsr olunmuş qəzəl-romans janrında bəstəkarlıq müsabiqəsini yekunlaşdırdı. Müsabiqə görkəmli şairin anadan olmasının 880 illiyi münasibətilə Respublika Prezidentinin 2021-ci ili “Nizami ili” elan etməsi ilə əlaqədar olaraq keçirilmişdir. Müsabiqənin keçirilməsində əsas məqsəd Azərbaycan bəstəkarı, musiqişünas-alim, Azərbaycan peşəkar musiqi sənətinin və milli operasının banisi  Üzeyir Hacıbəylinin “Sənsiz” və “Sevgili canan” əsərləri ilə təməlini qoyduğu  qəzəl — romans janrının ənənələrinin davam və inkişaf etdirilməsi,  Nizami Gəncəvinin  zəngin yaradıcılığının  müasir dövrdə vokal əsərlərdə musiqi və mətnlərin vəhdəti  ilə  ədəbi-bədii meyarlara cavab verən yeni qəzəl-romansların  aşkar edilməsidir.

Müsabiqənin şərtlərinə uyğun olaraq, müsabiqəyə peşəkar bəstəkarlar tərəfindən heç yerdə ifa edilməmiş və səslənməmiş yeni qəzəl-romanslar təqdim olunmuşdur.

Müsabiqənin Münsiflər Heyətinin — Azərbaycan Bəstəkarlar İttifaqının sədri, Xalq artisti, professor Firəngiz Əlizadə (sədr), Bəstəkarlar İttifaqının katibləri, Əməkdar incəsənət xadimləri, professor Zemfira Qafarova və Cəlal Abbasov, Əməkdar mədəniyyət işçiləri Səadət Təhmirazqızı və Xanlar Novruzovun iştirakı ilə keçən iclasın yekun qərarına əsasən müsabiqənin nəticələri elan olunmuşdur:

Birinci dərəcəli mükafata – Xalq artisti, professor Dadaş Dadaşov (“Aşiqəm” qəzəl-romansına görə),

İkinci dərəcəli mükafata – Lalə Cəfərova (“Səbr et”),

Üçüncü dərəcəli mükafata – Xalq artisti, professor Azər Dadaşov (“Sevgi qanaddır”) və

Fəxri Diploma 3 gənc bəstəkar  – Tahir İbişov (“Gül surətə nəzər sal”), Fərid Fətullayev (“Ay üzlü nigarım”), Kəmalə Əlizadə (“Nizaminin monoloqu) layiq görülmüşlər.

Bu gün ABİ-nın Ü.Hacıbəyli adına Konsert Salonunda müsabiqənin qaliblərinin mükafatlandırılması mərasimi keçirilmişdir.  Tədbirdə ABİ-nın sədri F.Əlizadə, ABİ-nın katibləri – Z.Qafarova və C.Abbasov, musiqişünas Səadət Təhmirazqızı çıxış edərək laureatları təbrik etmişlər. Laureatlar çıxış edərək Azərbaycan Bəstəkarlar İttifaqına bu gözəl təşəbbüsə görə minnətdarlıqlarını bildirərək, dahi Nizaminin adı ilə bağlı yeni  əsərlərin yaranmasını alqışlamışlar.

İyunun 18-də Azərbaycan Bəstəkarlar İttifaqında Xalq artisti, bəstəkar Cahangir Cahangirovun anadan olmasının 100 illiyi münasibətilə elmi konfrans keçirilib.

AZƏRTAC xəbər verir ki, ittifaqın sədri, Xalq artisti Firəngiz Əlizadə çıxış edərək tədbir haqqında məlumat verib. Tədbirin iki mühüm hadisəyə həsr olunduğunu söyləyən F.Əlizadə deyib: «Bu günlərdə xalqımız özünün ən gözəl bayramlarından birini — Milli Qurtuluş Gününü qeyd edib. Bu bayramın bu il qardaş Türkiyənin Prezidenti Rəcəb Tayyib Ərdoğanın iştirakı ilə qədim şəhərimiz, Qarabağın ürəyi sayılan Şuşa şəhərində qeyd olunması xüsusi əhəmiyyət daşıyır. İyunun 20-də görkəmli bəstəkar Cahangir Cahangirovun anadan olmasından 100 il ötür. Bəstəkarın yaradıcılığı öz çoxşaxəliyi ilə seçilir. Onun xor və instrumental musiqiləri, operaları, bir-birindən gözəl mahnıları var. Xor musiqisi sahəsində maraqlı əsərlərindən «Arazın o tayında» poemasını, 12 hissədən ibarət «Dostluq mahnısı» kompozisiyasını, «Azad» və «Xanəndənin taleyi» operalarının xor nömrələrini, «Füzuli», «Nəsimi», «Aşıq Alı» kantatalarını, «Sabir» oratoriyasını, Süleyman Ələsgərovla birlikdə yazdığı odanı, onlarca xor miniatürlərini göstərmək olar. Sadalanan əsərlərdən xüsusilə «Füzuli» kantatası Cahangir Cahangirova böyük şöhrət gətirmişdir. O, kantatada böyük şairin möhtəşəm obrazını, onun daxili aləmini özünəməxsus təsirli və qəlboxşayan musiqi dili ilə aça bilmişdir. Kantatanın mətn əsasını Füzulinin üç qəzəli təşkil edir. Hər bir qəzəl isə öz növbəsində bir hissəni özündə birləşdirir».

F.Əlizadə qeyd edib ki, Cahangir Cahangirovun xor sahəsindəki yaradıcılığı əsası Üzeyir Hacıbəyli tərəfindən qoyulan Azərbaycan xor sənətində zirvə sayılır: «1949-cu ildən başlayaraq bəstəkar Azərbaycan radiosunun nəzdində yaradılan xora rəhbərlik edərək 15 ildən artıq bu kollektivlə işləyib. Müəllifin yazdığı mahnıların çoxu ilk dəfə həmin kollektivin ifasında səslənib. Bununla yanaşı, o, Azərbaycan Dövlət Filarmoniyası nəzdindəki Mahnı və Rəqs Ansamblının bədii rəhbəri vəzifəsində çalışıb.

C.Cahangirov yaradıcılığının əsas hissəsini təşkil edən xor əsərləri Azərbaycan xor musiqisinin inkişafında əhəmiyyətli rol oynayıb. Onun musiqisi üçün nikbinlik, axıcı melodiya səciyyəvidir. Lirik mahnı janrının, eləcə də opera və instrumental musiqinin inkişafında da Cahangirovun xidməti əvəzsizdir».

Tədbir bəstəkarın yaradıcılığına həsr olunan məruzələrin dinlənilməsi ilə davam edib. Konfransda Əməkdar mədəniyyət işçisi, dosent Səadət Təhmirazqızı “Azərbaycan xor kollektivlərinin fəaliyyətində Cahangir Cahangirovun rolu”, Əməkdar mədəniyyət işçisi, dosent “Cahangir Cahangirovun kamera-vokal əsərlərində musiqi ilə poeziyanın qarşılıqlı əlaqəsi”, dosent Leyla Quliyevanın “Cahangir Cahangirovun yaradıcılığında opera janrı”, sənətşünaslıq üzrə fəlsəfə doktoru Həbibə Məmmədova “Cahangir Cahangirovun opera yaradıcılığında inqilabi mövzu”, gənc musiqişünas Aysel Kərim “Cahangir Cahangirovun xor yaradıcılığı – “Füzuli” kantatası” mövzusunda məruzələrlə çıxış ediblər.

Aprelin 14-də Azərbaycan Bəstəkarlar İttifaqında “Nizami və musiqi” mövzusunda elmi konfrans keçirilib.

AZƏRTAC xəbər verir ki, konfrans dahi Azərbaycan şairi Nizami Gəncəvinin 880 illiyinə həsr olunub.

Tədbirdə Azərbaycan Bəstəkarlar İttifaqının sədri, AMEA-nın müxbir üzvi, Xalq artisti, professor Firəngiz Əlizadə çıxış edərək konfransın əhəmiyyətindən danışıb. Vurğulayıb ki, bəşər bədii fikrinin nadir hadisəsi olan Nizami yaradıcılığı səkkiz əsrdən artıqdır ki, xalqımızın mənəviyyatının ayrılmaz hissəsinə çevrilmişdir. Nizami poeziyasının təsiri ilə bir çox bəstəkarlar şairin poemaları və qəzəlləri əsasında opera, balet, simfonik poema, oratoriya, romanslar bəstələmişlər.

Bəstəkarlar İttifaqının sədri bildirib ki, Prezident İlham Əliyevin dahi Azərbaycan şairi Nizami Gəncəvinin 880 illik yubileyi ilə əlaqədar 2021-ci ili “Nizami Gəncəvi İli” elan etməsi bəstəkar və musiqişünasları da çox sevindirib. Onlar bu əlamətdar yubileyə öz töhfələrini vermək üçün yeni əsərlər üzərində çalışırlar.

Nizami yaradıcılığında bəhrələnmiş bəstəkarlarla bağlı geniş siyahı tərtib etdiklərini söyləyən Xalq artisti bildirib ki, elə əsərlər vardır ki, hələ də sələndirilməyib və musiqişünas alimlər tərəfindən araşdırılmayıb. O, bu qəbildən olan əsərlərin sələndirilməsinin vacibliyini söyləyib.

Özünün də Nizami yaradıcılığından bəhrələnərək yeni əsər üzərində işlədiyini bildirən Xalq artisti Firəngiz Əlizadə bu qəbildən olan əsərlərin siyahısının daha da genişlənəcəyinə inamını ifadə edib.

Sonra Azərbaycan Bəstəkarlar İttifaqının məsul katibi, sənətşünaslıq üzrə elmlər doktoru, professor Cəmilə Həsənovanın “Qara Qarayev yaradıcılığında Nizami mövzusu”, Əməkdar mədəniyyət işçisi, sənətşünaslıq üzrə fəlsəfə doktoru Səadət Təhmirazqızının “Fikrət Əmirovun yaradıcılığında Nizami irsi”, Əməkdar mədəniyyət işçisi, sənətşünaslıq üzrə fəlsəfə doktoru, dosent Ülkər Talıbzadənin “Üzeyir Hacıbəylinin “Sənsiz” və “Sevgili canan” romans-qəzəllərində musiqi ilə poeziyanın qarşılıqlı əlaqəsi” və digər sənətşünas alimlərin məruzələri dinlənilib.

Tədbirdə Əfrasiyab Bədəlbəylinin “Nizami” operasından Əzranın ariozosu, Rənanın balladası səsləndirilib.

Boş dayansam, həyat dayanar…

Oqtay Rəcəbov: «Elə mahnım var ki, onu yuxuda görüb yazmışam”

 

80 yaş yaradıcı insanın özü qarşısındakı hesabatıdır. Geriyə boylananda gördüyü işlərdir, xalqı üçün yazıb yaratdıqlarıdır. Bu mənada görkəmli bəstəkar, alim və pedaqoq Oqtay Rəcəbovun qürurlanmağa haqqı var. Bəstəkar kimi yaradıcılığında mahnılar, simfoniyalar, librettolar, filmlərə yazılan musiqilər, vokal və instrumental əsərləri Azərbaycan musiqisini təkcə ölkəmizdə deyil, dünyada tanıdıb. Şirin nəğmələri Şövkət Ələkbərova, Mirzə Babayev, Zeynəb Xanlarova, Flora Kərimova, Yalçın Rzazadə kimi ifaçıların dilində səslənib. «Anam Azərbaycan”, «Nəğmələr”, «Necə unudum səni?”, «Zəfəran”, «Daha nə istəyirsən” və s. mahnıları dillər əzbərinə çevrilib. Yaradıcısı olduğu İncəsənət Gimnaziyasının yetirmələri beynəlxalq miqyasda çoxsaylı uğurlar qazanıblar. İncəsənət Gimnaziyasında işlədiyi dövrdə (1992-2001) ölkəmizdə ilk dəfə olaraq uşaqlar üçün opera studiyası və kinostudiya yaradılıb. Orada uşaqlar, məktəblilər opera və operetta janrında olan əsərlərdə aktyor, rejissor və operator kimi çıxış edərək qısametrajlı filmlər çəkilib. O.Rəcəbovun elmi-tədqiqat işləri onun yaradıcılığında xüsusi bir sahəni təşkil edir. 1984-cü ildə namizədlik, 1992-ci ildə isə doktorluq dissertasiyalarını müdafiə edib, professor adına layiq görülüb.
Görkəmli bəstəkar Tofiq Quliyevin məqalələrinin birində «Qafqazın Kabalevskisi» adlandırdığı bəstəkar bu gün də yorulmadan yazıb yaradır.
Aprelin 5-də 80 yaşını qeyd edən bəstəkarın yaradıcılıq eşqi musiqini özünə sənət yolu seçən gənclərə əsil örnəkdir desək, yanılmarıq.

— Oqtay müəllim, 80 ildir ki, həyatın cığırları ilə yol gəlirsiniz — yazıb yaradırsınız. Bəs «elədiklərim bəsdir” deyib dincəlmək haqda düşünmürsünüz?
— 80 yaş zəhmət çəkmək, gecə-gündüz nəsə fikirləşmək, nəsə yaratmaq, gördüyün işlərin hansınasa nail olmaq, hansınasa nail olmamaqdır. Çətin bir yoldur, amma şərəflidir. Özüm də hiss eləməmişəm ki, 80 yaş necə gəlib. Elə bil dünən anadan olmuşam, bu gün də 80 yaşım var. Həm elm, həm bəstəkarlıq sahəsində, həm də pedaqoji sahədə çox zəhmət çəkmişəm. Bütün cığırları çətinliklə də olsa özüm keçmişəm. Heç kəs mənim üçün yol açmayıb. 80 ildə bax, bunlar olub. Elə yazdıqlarım var ki, heç yerdə üzə çıxarmamışam. Amma o şeyləri ki, yazmağı arzulamışam, onları yazmışam. Bəzən elə əsərlər olub ki, yazmışam, amma üzə çıxarmaq istəyəndə «hələ tezdir” demişəm. Düzü, bilmirəm onların zamanı haçan gələcək. 80 az yaş deyil axı. Amma bu, məni qətiyyən həvəsdən salmır.

 

— Siz simfonik əsərlər, kino üçün musiqilər, mahnılar və musiqinin digər janrlarında əsərlər yazıbsınız. Hansı janrda yazmaq daha çətindir?

— Mən Konservatoriyanı simfonik əsərlə bitirdim. Bir gün Emin Sabitoğlu ilə küçədə görüşdük. Mən də təzəcə «Qız, oğlan və şir” filminə musiqi bəstələmişdim. Filmin sifarişini Moskva telekompaniyası vermişdi, özləri də çəkmişdi. Bu mənim ilk filmlərimdən biri idi, amma birincisi deyildi. İlk filmim «Dağ çayı” adlı sənədli ekran əsəri idi. Bu filmdə Mirvari Dilbazinin sözlərinə musiqi yazmışdım. Filmdə Flora Kərimovanın əvəzsiz ifası eşidilir. Bundan sonra 22 filmə musiqi yazmışam. Cizgi filmləri, bədii, sənədli filmlər… Multiplikasiya filmlərinə musiqi yazmaq ən çətinidir. Obrazı tapmaq, ona uyğun musiqi xarakteri yaratmaq asan deyil. Ümumiyyətlə, uşaqlar üçün musiqi yazmaq ən çətinidir. Çünki yazdığın musiqi uşaqların xoşuna gəlməli, maraqlı olmalıdır. Məsələn, necə ki, uşaqlar «Cücələrim” mahnısını bir dəfə eşitməklə sözləri ilə birlikdə oxuyurlar, elə yazmaq lazımdır. Mən elə bilirəm ki multiplikasiya filmlərində buna nail olmuşam. 8 filmin əksəriyyətində Flora Kərimova çox peşəkarlıqla və istedadla oxuyub. Bədii filmlərə musiqi yazmaq, musiqi xarakterləri yaratmaq da asan deyil. Sənədli filmlər isə bunlarla müqayisədə bir qədər asandır. Mən bu mərhələlərin hamısından keçmişəm. Güman edirəm ki, pis də keçməmişəm.

— Rus bəstəkarlarından birinin müsahibəsində belə bir fikirlə rastlaşdım: «Mahnıdan hansısa hissin formalaşmasını gözləmək doğru deyil”. Düzü, bir az çaşıb qalmışam. Peşəkar bəstəkar kimi sizin fikirləriniz maraqlıdır.
— Mən onun fəlsəfəsini başa düşdüm. Görünür o bəstəkar heç nədən zövq ala bilmir. Əksinə, mahnı və musiqinin bütün növləri insanın hiss orqanlarına təsir edir. Onda duyğular, yaşamaq eşqi yaradır. Mənim 500-dən çox mahnım var. Onların da yarıdan çoxu uşaqlar üçündür. Emin Sabitoğludan «Mən hansı janrla məşğul olum?” deyə soruşanda «Sən simfoniya da, uşaqlar üçün əsərlər də yazacaqsan, Amma birinci mahnıdan başla. Çünki bəstəkarı tanıtdıran ilk növbədə onun mahnılarıdır” dedi. Mahnı xalqımızın həyatı, çətin və şad günlərimizin yol yoldaşı, yaşantılarımızın əksidir. Mahnı insanda gözəl hisslər yaradır, inkişaf etdirir, zövqünü formalaşdırır. Gözəl mahnı həyatın özü qədər gözəldir.

 

— Bəzən deyirlər ki, yaxşı mahnı bir göz qırpımında yaranır. 500-dən artıq mahnı yazan bəstəkar kimi bu sirri yəqin çoxdan çözmüşünüz…

— Mənim elə mahnım var ki, onu yuxuda görüb yazmışam. Nüsrət Kəsəmənli ilə dost idik. Bir gün onlara gedəndə Zivər Ağayeva da orada idi. Məni görən kimi bir şeir verib: «Gör, bundan nəsə çıxara bilərsənmi?” dedi. Şeir mənə çox təsir etdi. Amma birdən-birə alınmadı. Uzun vaxt keçdi. Bir gün yuxuda gördüm ki, mahnını Flora Kərimova oxuyur. Yuxudan tez qalxıb yadımda qalan notları köçürdüm, səhəri gün üzərində işlədim. O mahnı çox populyarlaşdı, klip çəkildi, təkcə bizdə deyil, Türkiyədə də oxundu. Deyirlər ki, yaradıcı insanlar Allaha yaxın insanlardır. Onların kosmosla əlaqəsi çox genişdir. Ona görə də onlara gərək diqqət və qayğı olsun.

 

— Sizin bioqrafiyanızda qeyd olunub ki, Pedaqoji Universitetin fizika fakültəsini bitiribsiniz. Musiqi ilə fizika arasında əlaqəni necə tapdınız?

— Səs özü də fizikadır, fiziki hadisədir. Bu mənada oxşar cəhətlər çoxdur. Bizi əhatə edən hər şey fizikadır. İldırım çaxır — səsdir, yağış yağır — səsdir, dəniz dalğalanır — səsdir. Səs özü də musiqidir. Göy gurultusunun, dəniz dalğalarının öz musiqisi var. Bəstəkarın adi adamlardan fərqi budur ki, o səslərin musiqisini ayırd edib yaza bilir. Mən fizika fakültəsində oxuyurdum, paralel olaraq anamın təkidi ilə musiqi ilə məşğul olurdum. Musiqi də mənə yaxın idi. Beləcə fizika ilə musiqi arasında əlaqə tapa bildim. Fizika fakültəsindən sonra aspiranturanı, daha sonra konservatoriyanı bitirdim.

— Yaradıcılığınız boyu ünsiyyətdə olduğunuz, o cümlədən tərəf müqabiliniz olan insanlar – Fikrət Əmirov, Emin Sabitoğlu, Mirvari Dilbazi, Zivər Ağayeva, Aqşin Babayev, Həsən Əbluc, həmçinin. mahnılarınızı oxuyanların çoxu artıq həyatda yoxdurlar. Boşluq çoxmu dərindir?

— Aqşin Babayevlə iki musiqili komediya- «Əlin cibində olsun” və ”Şeytanın yubileyi”ni işləmişəm. Çox istedadlı insan idi. İndi deyirəm ki, kaş sağ olaydı, 3-cü əsəri də onunla işləyəydim. Əlbəttə, boşluq hiss olunur. O insanların yeri görünür…

 

— İndi hansı əsər üzərində işləyirsiniz?
— Boş dayanmıram. Boş dayansam, elə bilərəm ki, həyat dayanıb. Bilmirəm, nə qədər yaşayacağam. Anamın atası 140 il yaşayıb. O Qubadan idi. Anam tərəf uzunömürlülər idi. Atam isə Şamaxıdan idi. Onların nəsli uzunömürlü deyildi.

 

— Ana tərəfinizin uzunömürlü olmasında musiqinin rolu olubmu?

— Ana babam sazda gözəl çalırdı. Hər yayda anam məni Qubaya göndərərdi. Mən onun çaldığı musiqiləri eşidərdim. Digah kəndi çox istedadlı insanlar yetişdirib. Kənddə gözəl xalq mahnıları oxuyardılar. Səhərdən-axşama qədər orada xalq mahnıları eşitmək mümkün idi. Görünür bütün bunların təsiri olub. İnsanı əhatə edən mühitdən çox şey asılıdır.

Sən yalnız çal, oxuma…

 

— Pandemiya vaxtı özünüzü necə qoruyursunuz?
— Kim nə deyirsə, ondan fayda götürməyə çalışıram. Ancaq pandemiya dövründə xeyli iş gördüm. Pandemiyaya qədər 7 simfoniyam vardı, indi artıq onların sayı 9-dur. Azərbaycan musiqisinə dair 680 səhifəlik ensiklopediyanı dərc etdirdim. Mədəniyyət və Təhsil nazirlikləri və Bəstəkarlar İttifaqı maliyyə dəstəyi göstərdilər. Hazırda Azərbaycan muğamları
haqqında bir ideyam var, böyük bir monoqrafiya oraya çıxarmaq istəyirəm. Bilirsiniz problem nədədir? O zaman Hacı Zeynalabdin Tağıyev Musiqili Teatrını, milyonçu Mayılov qardaşları Opera Teatrını tikdirdilər. Nədənsə indiki iş adamları bu cür xeyriyyəçi addımlara laqeyddirlər. İndi çətin dövrdür. Hər şeyi dövlətdən ummaq olmaz. Müharibədən sonrakı mərhələni yaşayırıq. Amma varlı insanlar, iş adamları yeni əsərlərin ortaya çıxmasına dəstək ola bilərlər. Arzum budur ki, onlar üzlərini sənətə tərəf çevirsinlər.

 

— Elə bir mahnınız varmı öz ifanızda daha yaxşı səslənsin. Məsələn, bəstəkar Yan Frenkel yazdığı məşhur «Durnalar” mahnısını öz səsi ilə ifaçılardan daha şirin oxuyurdu…

— Sualınıza Flora Kərimovanın bir sözü ilə cavab verim: Bir gün «Necə unudum səni” mahnısını Flora xanımın yanına aparmışdım. Çaldım qulaq asdı. Oxumağa çalışdım – qulaq asdı. 4-5 dəfə təkrar etdikdən sonra: «Oqtay, sən bundan sonra yalnız çal, oxuma” dedi. Müəllimim Fikrət Əmirovun da səsi yox idi. Bir gün yanına uşaq mahnısı aparmışdım. «Fikrət müəllim, bilirsiniz necə eybəcər səsim var?” deyincə «Sən hələ mənim səsimi bilmirsən. Sənin səsin mənim səsimin yanında toya getməlidir” dedi. Ona görə, mən ancaq yazıram, oxumalı olan müğənnilər də oxuyur…

Söhbətləşdi
Təranə Məhərrəmova

Bu günlərdə dahi bəstəkar Qara Qarayevin yetirməsi, Respublikanın Əməkdar incəsənət xadimi, Azərbaycan Milli Konservatoriyasının professoru, təcrübəli pedaqoq, gözəl və nəcib insan Faiq Nağıyevin 75 yaşı tamam olur. Yaradıcılığı daima musiqi ictimaiyyətinin marağına səbəb olan, geniş dinləyici kütlələrinin rəğbətini qazanan F.Nağıyevin əsərləri özünəməxsus fərdi musiqi dili, yüksək peşəkar yazı üslubu ilə fərqlənir. Azərbaycan xalq musiqisini dərindən bilən, müasir bəstəkarlıq texnikasına yaxından bələd olan, daima yeni ifadə üsulları axtaran bəstəkarın  hər bir əsəri maraqlı yaradıcılıq ideyalarının bədii təcəssümüdür.

Zəmanəsinin ictimai-siyasi problemlərinə həssaslıqla yanaşan, həyatın müxtəlif təzadlarını dərk etməyə çalışan bəstəkarın  yaradıcılığının əsas qayəsini yüksək bəşəri ideyaların bədii inikası təşkil edir. Əsil vətəndaşlıq mövqeyindən çıxış edən F.Nağıyev ölkəmizin həyatında baş verən tarixi hadisələrə heç bir zaman biganə qalmamışdır. Onun əsərlərində Vətənin tərənnümü, böyük müəllimə məhəbbət, xalqın azadlıq mübarizəsi, qəhrəman-şəhidlərin xatirəsi kimi mövzular parlaq bədii əksini tapmışdır. F.Nağıyev milli musiqi mədəniyyətimizin önəmli səhifələrini təşkil edən bir sıra orijinal əsərlərə imza atmış bir bəstəkar kimi tanınır.

Ötən əsrin 70-ci illərində müstəqil yaradıcılıq yoluna qədəm qoyan bəstəkar musiqinin müxtəlif janrlarında əsərlər yazmışdır. O, 2 Simfoniya, 2 Simfonik poema, “Şəhidlərdən-Şəhidlərə” simfonik süitası (eyniadlı sənədli filmin musiqisi əsasında), vokal-simfonik əsərlər (“Ana torpaq” Kantatası, “Sumqayıt” və “Azadlıq” Odaları və s.), a ‘cappella xoru üçün “Qara Qarayevin xatirəsinə Konsert”, piano və simli orkestr üçün “Tokkata-poema”, simli kvartet, xor miniatürləri (“Şam”, “Aşiqəm”, “Əl üstə kimin əli” və s.), kamera-instrumental əsərlər, mahnı və romanslar, kino musiqisinin müəllifidir.

Bəstəkarın   yaradıcılığında   xor   musiqisi   xüsusi   yer  tutur. Məhz xor musiqisi sahəsində bəstəkarın üslubuna xas olan səciyyəvi xüsusiyyətlər daha parlaq şəkildə özünü büruzə vermişdir. Onun solist və a ‘cappella xoru üçün “Qara Qarayevin xatirəsinə Konsert”i Azərbaycanda xor konserti janrında yazılmış ilk əsərdir. Bəstəkarın xor miniatürləri Respublikamızın, eləcə də bir sıra xarici ölkələrin (Rusiya, Türkiyə) xor kollektivlərinin ifasında dəfələrlə səslənmiş, onların daimi repertuarında özünə möhkəm yer tutmuşdur. Bu əsərlər Bakı Musiqi Akademiyasının və respublikanın musiqi kolleclərinin tədris proqramına daxil edilmiş, müxtəlif respublika nəşriyyatlarında çap olunmuşdur.

Nağıyev Faiq Həbib oğlu 1946-cı il fevralın 13-də Gəncə şəhərində anadan olub. İlk musiqi təhsilini 1955-1960-cı illərdə Gəncə şəhər 1 saylı uşaq musiqi məktəbinin kamança sinfində alaraq, o, Qəmbər Hüseynli adına Gəncə Musiqi Texnikumunun kamança sinfində təhsilini davam etdirmişdir. Lakin musiqi nəzəriyyəsinə və bəstəkarlığa olan meyli onun ali musiqi təhsilini iki ixtisas üzrə — musiqişünaslıq (1964-1969) və bəstəkarlıq (1969-1975) üzrə alması ilə nəticələnmişdir. 1969-cu ildə o, professor Məmmədsaleh İsmayılovun rəhbərliyi ilə yazdığı “Humayun vokal-instrumental muğamı” mövzusunda diplom işini təqdim edərək, konservatoriyanı musiqişünaslıq ixtisası üzrə bitirir. Bəstəkarlıq ilə ciddi şəkildə məşğul olmağı qərara alan F.Nağıyev həmin ildə Azərbaycan Dövlət Konservatoriyasının “Bəstəkarlıq” fakultəsinə daxil olur. Qəbul imtahanında dahi bəstəkar, professor Qara Qarayev gənc bəstəkarın təqdim etdiyi əsərləri yüksək qiymətləndirir və onun piano üçün Sonatasında Prokofyev musiqisinin təsiri olduğunu xüsysi qeyd edir. F.Nağıyev böyük pedaqoq Qara Qarayevin sinfində  kompozisiya, musiqi forması, müasir bəstəkarlıq texnikası sahəsində mükəmməl biliklərə yiyələnərək müxtəlif musiqi janrlarında qələmini sınayır. Bu illərdə  Q.Qarayevin sinfində F.Nağıyevlə yanaşı bir sıra bəstəkarlar – o cümlədən F.Əlizadə, İ.Hacıbəyov, A.Əzimov, E.Dadaşova və b. təhsil almışlar. Q.Qarayev hər bir tələbənin yaradıcılıq potensialını öncədən görür və onun müstəqil üslub xəttini istiqamətləndirirdi.

1975-ci ildə F.Nağıyev böyük simfonik orkestr üçün yazılmış 1 saylı Simfoniyanı diplom işi kimi təqdim edərək konservatoriyanı bitirir. Konservatoriyanı bitirdikdən sonra bəstəkar müxtəlif musiqi janrlarına müraciət edərək öz yaradıcılıq axtarışlarını davam etdirir. Bu dövrdə bəstəkarın yaradıcılığında əsasən xor musiqisi və vokal-simfonik janrlı əsərlər üstünlük təşkil etməyə başlayır. Artıq 1977-ci ildən  SSRİ və Azərbaycan Bəstəkarlar İttifaqının üzvü olan F.Nağıyevin xor musiqisi nəinki respublikamızda, habelə onun hüdudlarından kənarda da xüsusi rəğbət qazanmışdır.

1977-ci ildə Azərbaycan Xor Cəmiyyətinin nəzdində Kamera Xoru (bədii rəhbər — Ləman Atakişiyeva) yaradılır. Ümumiyyətlə, qeyd etmək lazımdır ki, o dövrdə Kamera Xoru bir sıra gənc Azərbaycan bəstəkarlarının “yaradıcılıq laboratoriyası”na çevrilmişdi. F.Nağıyevlə yanaşı digər bəstəkarlar — A.Əzimov, C.Quliyev, A.Dadaşov və b. bu kollektiv üçün xor miniatürləri yazmışlar.

Xor miniatürü janrı F.Nağıyevin yaradıcılığında xüsusi əhəmiyyət daşıyır. Bəstəkarın orijinal musiqi dili ilə seçilən xor miniatürləri Azərbaycan xor sənətinin inkişafında mühüm rol oynamış yüksək peşəkar səviyyəli musiqi nümunələridir.    Onun 1978-ci ildə yazılmış iki xor miniatürü — Məhsəti Gəncəvinin sözlərinə qarışıq a ‘cappella xoru üçün “Şam” və xalq bayatılarına yazılmış “Aşiqəm”  Kamera Xorunun daimi repertuarına daxil edilmişdi.

Bu dövrdə Respublikanın uşaq xor kollektivlərinin repertuarında Azərbaycan bəstəkarlarının əsərləri azlıq təşkil edirdi. Xor rəhbərlərinin xüsusi müraciəti ilə  F.Nağıyev a’cappella uşaq xoru üçün bir sıra mahnılarını — “Əl üstə kimin əli”(söz: X.Rza), “Nərgizin mahnısı” (söz: M.Dilbazi), “Xatırlayarsan məni” (söz: M.Seyidzadə) və s. yazmışdır. “Əl üstə kimin əli” əsəri 1979-cu ildə Kirov şəhərində keçirilən Ümumittifaq Uşaq Xor Festivalında (tərcümədə) müvəffəqiyyətlə ifa edilmişdir.

Bəstəkarın yaradıcılığında xüsusi yer tutan əsərlərdən biri də Xaqani Şirvaninin sözlərinə solist və a’cappella xoru üçün “Qara Qarayevin xatirəsinə Konsert”dir. Əsər ilk dəfə 1991-ci ildə Moskvada SSRİ Bəstəkarlar İttifaqının VIII Qurultayı günlərində P.Çaykovski adına Moskva Dövlət Konservatoriyasının Böyük zalında Azərbaycan Dövlət Xor Kapellasının (dirijor – Elnarə Kərimova) ifasında səslənmişdir.

Azərbaycan xor musiqisi sahəsində yeni söz olan bu əsərdə bəstəkar ilk dəfə olaraq konsert janrına müraciət etmişdir. Bu əsəri həmçinin dahi bəstəkar, böyük müəllim Q.Qarayevin xatirəsinə həsr edilmiş Rekviyem də adlandırmaq olar. Xor musiqisində ilk dəfə olaraq dini mövzuya — islam motivlərinə müraciət edən bəstəkar  Azərbaycan milli musiqi folklorunun ənənəvi janrları olan mərsiyyə və mədhiyyənin ifadə xüsusiyyətlərindən, matəm mərasimlərinə xas intonasiyalardan istifadə etmişdir.

F.Nağıyevin əsərləri özünəməxsus fərdi musiqi dili ilə daima musiqi ictimaiyyətinin marağına səbəb olur. Onun əsərləri mütəmadi olaraq Azərbaycan Bəstəkarlar İttifaqının Qurultay, Plenum, Festival və s. konsert proqramına daxil edilərək, Respublikanın aparıcı kollektivləri və görkəmli ifaçıları tərəfindən ifa edilir. Bəstəkarın Xəlil Rzanın sözlərinə metso-soprano, qiraətçi, qarışıq xor və böyük simfonik orkestr üçün “Ana torpaq” Kantatası (1979) ilk dəfə 1986-cı ildə Azərbaycan Bəstəkarlar İttifaqının “Gənc bəstəkarların əsərlərindən ibarət Plenumu”nda böyük uğurla ifa edilmişdir. Onun görkəmli violin ifaçısı Bəyazit Axundova həsr olunmuş solo violin üçün Sonatası  ilk dəfə 1983-cü ildə Azərbaycan Bəstəkarlar İttifaqının konsert salonunda B.Axundovun ifasında səslənmiş, sonralar Türkiyənin Ankara şəhərində dəfələrlə ifa edilmişdir. 2012-ci ildə isə bu əsər bəstəkarın yeni redaktəsi ilə  Azərbaycan Bəstəkarlar İttifaqının IX Qurultayının konsert proqramına daxil edilərək, gənc violin ifaçısı, beynəlxalq müsabiqələr laureatı Cavad Tağızadənin təfsirində səslənmişdir.

Ölkəmizin tarixinə qanlı hərflərlə yazılmış “20 Yanvar” faciəsi, “Xocalı” soyqırımı, xalqımızın başına gətirilən digər müsibətlər doğma  Vətənini hədsiz dərəcədə sevən əsil vətənpərvər insan kimi F.Nağıyevin  də qəlbində təlatüm yaratmışdır. O,  bu illərdə yazılmış əsərlərində Azərbaycana qarşı aparılan təcavüzkarlıq siyasətinə qarşı öz etiraz səsini ucaltmışdır. Bəstəkarın 1991-ci ildə rejissor Xamiz Muradov tərəfindən “Azərbaycanfilm” kinostudiyası nəzdində “Salnamə” studiyasında çəkilmiş “Şəhidlərdən-şəhidlərə” adlı sənədli filmə yazdığı musiqidə bu faciəvi hadisələr öz əksini tapmışdır.

Bəstəkarın memorial səciyyə daşıyan əsərlərindən biri də 2012-ci ildə Xocalı soyqırımının 20-ci ildönümü münasibəti ilə  yazılmış, qarışıq xor və böyük simfonik orkestr üçün Rekviyem – “Xocalı harayı” əsəridir. Bu əsərdə bəstəkar Xocalı faciəsində həlak olmuş insanların o dəhşətli gecədə keçdiyi iztirablı yolların maraqlı ifa üsulları ilə bədii əksini yaratmağa çalışmışdır.  

F.Nağıyev bəstəkarlıqla yanaşı geniş pedaqoji fəaliyyət göstərir. O, müxtəlif illərdə Gəncə şəhər 2 saylı uşaq musiqi məktəbində, Qəmbər Hüseynli adına Gəncə Musiqi Texnikumunda, Soltan Hacıbəyov adına Sumqayıt Musiqi Texnikumunda, Lənkəran Dövlət Universitetində, Ü.Hacıbəyli adına Bakı Musiqi Akademiyasında fəaliyyət göstərmişdir. Hazırda o, Azərbaycan Milli Konservatoriyasının “Milli musiqinin tarixi və nəzəriyyəsi” kafedrasının professorudur.

Öz pedaqoji fəaliyyətində həmişə böyük müəllimindən əxz etdiyi metodikanı əlində rəhbər tutan F.Nağıyev  Azərbaycan professional musiqi ənənələrini davam etdirərək, gənc musiqiçilər nəslinin hazırlanması sahəsində yorulmadan çalışır. Hazırda F.Nağıyevin yetirmələri Respublikanın müxtəlif musiqi müəssisələrində çalışaraq musiqi mədəniyyətimizin inkişafına öz töhfələrini verirlər.

2007-ci ildə Azərbaycan Respublikasının “Əməkdar incəsənət xadimi” fəxri adına layiq görülən F.Nağıyev həmçinin, fəal musiqi-ictimai xadimdir. O, Azərbaycan Bəstəkarlar İttifaqının VIII (2007) və IX (2012) Qurultaylarında ABİ-nın İdarə Heyətinin üzvü seçilmişdir. F.Nağıyev ABİ-nın “Xor musiqisi” bölməsinin sədri kimi təşkilatın işində yaxından iştirak edir.

Bu gün yaradıcılığının kamillik dövrünü yaşayan, yüksək peşəkarlıq prinsiplərinə sadiq qalaraq,  milli musiqi mədəniyyətimizin tərəqqisi naminə yorulmadan çalışan bəstəkarı 75 illik yubileyi münasibətilə səmimi qəlbdən təbrik edir, ona möhkəm can-sağlığı, uzun ömür, yazıb-yaratmaq eşqi arzulayırıq!

 

Sevda Hüseynova

Musiqişünas, Azərbaycan Bəstəkarlar ittifaqının baş məsləhətçisi

Azərbaycan Bəstəkarlar İttifaqı pandemiya dövründə bütün mədəni-kütləvitədbirlərin ləğv olunmasına baxmayaraq, ötən dövr ərzində öz fəaliyyətinimütəmadi olaraq davam etdirmişdir. Təşkilatın müxtəlif musiqi janrlarını əhatəedən bölmələrinə bəstəkarlarımızın yeni əsərləri təqdim olunmuş, on-line işşəraitində müsabiqələr, konfranslar və tədbirlər keçirilmişdir.
Qarabağ uğrunda şanlı Azərbaycan Ordusunun apardığı Vətən müharibəsi dövründə xalqımızın hərbi-vətənpərvərlik ruhlu mahnı və marşlara tələbatı daha daartmış və bu tələbatı ödəmək məqsədilə Azərbaycan Bəstəkarlar İttifaqındasəmərəli iş aparılmışdır. Azərbaycan bəstəkarlarının son dövrdə yaranmışvətənpərvərlik mahnıları və marşları toplanaraq, notları və səs yazıları Mədəniyyət Nazirliyinə təqdim edilmişdir.
Azərbaycan Bəstəkarlar İttifaqının “Azərbaycan bəstəkarları və musiqişünasları” layihəsi üzrə işlər davam etdirilərək, 19 broşür “Renessans-A”Nəşriyyat Evində çap olunmuşdur. Bu layihə üzrə növbəti mərhələdə işlər davametdirilir. Habelə, Azərbaycan Bəstəkarlar İttifaqı tərəfindən “Tofiq Bakıxanovunbalet yaradıcılığı” adlı məqalələr toplusu (tərtibçi – Günay Məmmədova, redaktor– Rafael Hüseynov) işıq üzü görmüşdür.
Azərbaycan Bəstəkarlar İttifaqının İdarə Heyətinin 17 fevral tarixindəkeçirilmiş növbəti iclası təşkilatın fəaliyyətinin 2020-ci il üzrə yekunlarına və2021-ci ilin birinci yarımilində nəzərdə tutulan tədbirlər planının müzakirəsinə həsrolunmuşdu. Azərbaycan Bəstəkarlar İttifaqının sədri, Xalq artisti, professorFirəngiz Əlizadə öz çıxışında təşkilatın fəaliyyətini dəyərləndirərək, ötən ilinpandemiya məhdudiyyətləri ilə yanaşı, Qələbə ili kimi yaddaşlara həkkolunduğunu xüsusi vurğuladı. Firəngiz xanım Respublikanın Prezidenti cənabİlham Əliyev tərəfindən 2021-ci ilin “Nizami Gəncəvi ili” elan edilməsimünasibəti ilə, Bəstəkarlar İttifaqı tərəfindən keçiriləcək “Qəzəl-romans”müsabiqəsində bəstəkarlarımıza fəal iştirak etməyi, Ü.Hacıbəyli ənənələrini yenimərhələdə inkişaf etdirməyi tövsiyyə etdi. Tədbirdə iştirak edən “Qafqaz Media” İctimai Birliyinin sədri Azadə xanımHüseynova Firəngiz Əlizadənin beynəlxalq aləmdə nüfuz qazanmış zəngin yaradıcılığını, geniş ictimai və vətənpərvərlik fəaliyyətini dəyərləndirərək, ona“Qafqaz Media” İctimai Birliyinin təsis etdiyi “Xarı Bülbül” Medalını təqdim etdi.Bu il bir sıra görkəmli bəstəkar və musiqişünaslarımızın yubileylərinin genişsurətdə keçirilməsi mümkün olmasa da, Azərbaycan Bəstəkarlar İttifaqı tərəfindənmətbuat səhifələrində yubilyar bəstəkarlar və musiqişünaslar haqqında məqalələr,təbriklər çap olunmuşdur.
Tədbirdə həmçinin, görkəmli musiqişünas, Əməkdarincəsənət xadimi, sənətşünaslıq elmləri doktoru, professor İmruz Əfəndiyevanın 85illiyi və tanınmış bəstəkar, Əməkdar incəsənət xadimi, professor Faiq Nağıyevin75 illiyi münasibətilə Azərbaycan Bəstəkarlar İttifaqı tərəfindən yubilyarlara təbrikünvanları təqdim edildi. Bəstəkarlar İttifaqının növbəti tədbirlər planının müzakirəsində iştirak edənABİ-nın katibləri — Əməkdar incəsənət xadimi, professor Zemfira Qafarova vəƏməkdar incəsənət xadimi, professor Cəlal Abbasov, ABİ-nın məsul katibi,sənətşünaslıq elmləri doktoru, professor Cəmilə Həsənova və b. çıxış edərək, özyeni təkliflərini bildirdilər.

Dahi Azərbaycan şairi və mütəfəkkiri Nizami Gəncəvi bəşəriyyətin bədii fikir salnaməsində yeni səhifə açmış nadir şəxsiyyətlərdəndir. 2021-ci ildə Nizami Gəncəvinin anadan olmasının 880 illiyi münasibətilə Azərbaycan Respublikasının Prezidenti İlham Əliyev bu ili “Nizami Gəncəvi İli” elan edib. Azərbaycan Bəstəkarlar İttifaqı “Nizami Gəncəvi İli”nə həsr olunmuş qəzəl-romans müsabiqəsi elan edib.

İttifaqdan4AZƏRTAC-a bildirilib ki, müsabiqənin keçirilməsində əsas məqsəd görkəmli bəstəkar, musiqişünas-alim, Azərbaycan peşəkar musiqi sənətinin və milli operasının banisi Üzeyir Hacıbəylinin “Sənsiz” və “Sevgili canan” əsərləri ilə təməlini qoyduğu qəzəl-romans janrının ənənələrinin davam və inkişaf etdirilməsi, Nizami Gəncəvinin zəngin yaradıcılığının müasir dövrdə vokal əsərlərdə musiqi və mətnlərin vəhdəti ilə ədəbi-bədii meyarlara cavab verən yeni qəzəl-romansların aşkar edilməsidir.

Müsabiqəyə heç bir yerdə səslənməmiş və nəşr olunmamış yeni qəzəl-romanslar təqdim edilməlidir. Təqdim ediləcək əsərlər vokal ilə müxtəlif tərkibli instrumental ansambllar (2-3 alət) üçün nəzərdə tutularaq, 7-10 dəqiqəlik vaxt həcmində olmalıdır.

Müsabiqə iştirakçıları əsərin klavirini PDF formatında (və ya partiturasını) və yüksək formatda yazılmış CD audio versiyasını, romansın mətnini və müəllif haqqında məlumatları (ad, soyad, təhsil, ünvan, telefon) Azərbaycan Bəstəkarlar İttifaqının music0306@mail.ru   və  azcomposersunion@gmail.com elektron ünvanına təqdim еtməlidirlər. Əsərlər səs və fortepiano ifasında və ya səsyazma şəklində

təqdim olunmalıdır. Müsabiqədə peşəkar bəstəkarlar iştirak edə bilərlər.

Müsabiqənin qalibləri 18 sentyabr — Milli Musiqi Günündə elan ediləcək.

Müsabiqənin qalibləri üçün aşağıdakı mükafatlar nəzərdə tutulur:

I yer – 1000 manat
II yer – 700 manat
III yer – 500 manat

Fəxri diplom – 300 manat

Тəqdim olunmuş işlər bu il iyunun 15-dək Azərbaycan Bəstəkarlar İttifaqında onlayn qəbul ediləcək. Əsərlər Bəstəkarlar İttifaqının tərtib etdiyi münsiflər heyəti tərəfindən qiymətləndiriləcək.

      Azərbaycan Bəstəkarlar İttifaqının fəaliyyətində vətənpərvərlik mövzusundayazılmış əsərlər mühüm ter tutur. İkinci Qarabağ müharibəsi dövründə — uzun illərdoğma torpaqlarımızı işğal altında saxlayan erməni silahlı qüvvələrinə qarşıaparılan mübarizədə Azərbaycanın Müzəffər Ordusunun parlaq Qələbə qazanmasınəticəsində bu mövzu xüsusilə aktuallıq kəsb edir. Bu möhtəşəm Qələbə bizisevindirib fərəhləndirməklə yanaşı, həmçinin bəstəkarlarımızın doğma Vətənimizi,onun rəşadətli döyüşçülərini, bənzərsiz təbiətini, milli dəyərlərimizi vəsf edənəsərlərinin təbliğ edilməsinə yönələn yeni yaradıcılıq layihələrinə sövq edir.

Bu məqsədlə, Azərbaycan Bəstəkarlar İttifaqı “Vətənpərvərlik mövzusunda xor əsərlərinin ən yaxşı ifası” üzrə Respublika onlayn Müsabiqə-Festival elan edir.Müsabiqənin musiqi əsasını bəstəkar, Azərbaycanın Xalq artisti, professor AzərDadaşovun xor kollektivləri üçün yazılmış əsərləri təşkil edir. Azər Dadaşovmüxtəlif musiqi janrlarında yazılmış çoxlu sayda əsərlərin müəllifidir. Onunyaradıcılığında vətənpərvərlik məzmunlu xor musiqisi, həmçinin Vətənimizi, onunşanlı oğullarını, Qələbə qazanan igid əsgərləri vəsf edən xor mahnıları əhəmiyyətliyer tutur.

Müsabiqə 2021-ci il 22-26 noyabr tarixlərində Bakı şəhərində keçiriləcək vəbəstəkarın 75 illik yubileyinə həsr olunmuşdur. Müsabiqədə Respublikanın ali vəorta-ixtisas təhsili müəssisələrinin, həmçinin musiqi və ümumtəhsil məktəblərininxor kollektivləri iştirak edə bilərlər.

Müsabiqənin münsiflər heyətinə tanınmış musiqi xadimləri, AzərbaycanBəstəkarlar İttifaqı İdarə Heyətinin üzvləri, xormeysterlər daxil ediləcəklər.

Müsabiqə 2 turda keçiriləcək. Birinci turun proqramına A.Dadaşovunistənilən 3 xor mahnısı daxil edilə bilər, ikinci turun proqramında isə bəstəkarın ikixor mahnısı – “Vətənim var” və “Qızıl dan” mütləq şəkildə ifa edilməlidir

2021-ci il noyabrın 1-dək Müsabiqədə iştirak etmək istəyən xor kollektivləriyalnız onlayn şəkildə qeydiyyatdan keçərək, ifa ediləcək xor əsərlərinin DVD lentyazısını, kollektivin yaradıcılığı haqqında məlumatı, foto şəkili AzərbaycanBəstəkarlar İttifaqının azcomposersunion@gmail.com e-mail ünvanına təqdimetməlidirlər. Qeydiyyat forması tam doldurulmadığı halda, həmin ərizənin qəbuluprosesi dayandırıla bilər

Müsabiqənin qalibləri və iştirakçıları üçün pul mükafatları, diplomlar, xüsusihədiyyələr nəzərdə tutulur.
Müsabiqənin mükafat fondu beş min manat təşkil edir.Məlumat üçün Azərbaycan Bəstəkarlar İttifaqının aşağıdakı əlaqə nömrələrinəmüraciət edə bilərsiniz: Tel.: (012) 598 08 86; (012) 598 08 84

Bakı, 5 fevral, AZƏRTAC

Fevralın 5-də görkəmli Azərbaycan bəstəkarı, Dövlət mükafatı laureatı, SSRİ Xalq artisti, Sosialist Əməyi Qəhrəmanı Qara Qarayevin xatirəsi Fəxri xiyabanda yad olunub.

AZƏRTAC xəbər verir ki, Mədəniyyət Nazirliyinin rəhbərliyi, tanınmış incəsənət və mədəniyyət xadimləri, habelə ictimaiyyət nümayəndələrinin iştirak etdiyi anım tədbirində əvvəlcə görkəmli sənətkarın məzarı önünə tər güllər düzülüb.

Mədəniyyət naziri Anar Kərimov çıxış edərək görkəmli bəstəkarın musiqi mədəniyyətimizin inkişafındakı xidmətlərindən söz açıb. Bildirib ki, Qara Qarayev yaradıcılığı Azərbaycan musiqi mədəniyyəti tarixində parlaq səhifələri özündə ehtiva edir. Nazir deyib ki, milli bəstəkarlıq məktəbinin banisi Üzeyir Hacıbəylinin ənənələrini yeni səviyyədə davam etdirən Qara Qarayev, öz yaradıcılığı ilə əsl sənət məktəbi yarada bilib. Qara Qarayev XX əsrin elə parlaq simalarındandır ki, onun istedad və sənətkarlığı Azərbaycan musiqi sənətinin inkişaf mərhələlərini müəyyən edib. Vurğulayıb ki, Qara Qarayev qırx illik yaradıcılıq dövründə demək olar ki, bütün janrlarda əsərlər yaradıb: “O, üç simfoniya, simfonik janrda 20-dən çox əsər, 50-dən çox kamera əsəri, o cümlədən fortepiano üçün 24 prelüd bəstələyib, iki opera, iki balet, bir müzikl, Bakı, Moskva, və Leninqradın çoxsaylı teatr tamaşası və kinofilmləri üçün musiqi yazıb. Qara Qarayev yaradıcılığının tarixi əhəmiyyəti bundadır ki, o, Azərbaycan xalq musiqisini ümumbəşəri musiqi nailiyyətləri ilə qarşılaşdırıb, onun sintezini yaradıb və bunu parlaq şəkildə nümayiş etdirib. Qara Qarayev onlarca görkəmli bəstəkar yetirib «Qarayev bəstəkarlıq məktəbini» yaradıb. Azərbaycan musiqi mədəniyyətinin görkəmli nümayəndələri olan Rauf Hacıyev, Arif Məlikov, Xəyam Mirzəzadə, Vasif Adıgözəlov, Musa Mirzəyev, Tofiq Bakıxanov, Firəngiz Əlizadə, Azər Dadaşov, Polad Bülbüloğlu, Fərəc Qarayev, Elnarə Dadaşova Qarayev məktəbinin davamçılarıdır. Çox sevindirici haldır ki, Nazirliyin təşkilati və maliyyə dəstəyi ilə 2018-ci ildən başlayaraq Fransanın məşhur “Mezzo” kanalında Qara Qarayevin simfonik və kamera-instrumental əsərləri böyük uğurla səslənir. Qara Qarayev eyni zamanda sabahın musiqiçisidir. Onun parlaq yaradıcılığı artıq dünya musiqisinin ayrılmaz bir parçasıdır. Biz hələ neçə illər sonra da bu ölməz musiqinin sədasını eşidəcəyik və bundan qürur duyacağıq”.

Azərbaycan Bəstəkarlar İttifaqının sədri, Xalq artisti Firəngiz Əlizadə bildirib ki, yaradıcılığı zəngin milli köklərə əsaslanan Qara Qarayev Azərbaycan musiqisinin yeni mərhələdə inkişafını təmin edən sənətkarlardandır.

“Qara Qarayev yaradıcılığı böyük məktəbdir, mən onun tələbəsi olduğum üçün hər zaman qürur duymuşam. Azərbaycan və dünya musiqi mədəniyyətinə böyük töhfələr vermiş Qara Qarayev milli və bəşəri xarakterli yaradıcılığı ilə gələcəyə yeni yollar açan novator sənətkar olub. Onun hər bir əsərinin premyerası musiqi həyatımızın xüsusi hadisəsinə, bayramına çevrilib, mədəni həyatımızda bir dönüş yaradıb”, — deyə F.Əlizadə söyləyib.

Ü.Hacıbəyli adına Bakı Musiqi Akademiyasının rektoru, Xalq artisti Fərhad Bədəlbəyli isə Qara Qarayev yaradıcılığının dünyada yenidən aktuallaşdığını diqqətə çatdırıb: “Mən düşünürəm ki, onun əsərləri dünyanın ən möhtəşəm səhnələrində səsləndirilməli, ideyaları yayılmalıdır, çünki dünyanın buna ehtiyacı var. Bir də Qara Qarayev beynəlxalq festivalının bərpa edilməsini arzulayıram. Bu Azərbaycan musiqisinin dünyada daha da tanıdılmasına xidmət edəcək”.

Azərbaycan Milli Konservatoriyasının rektoru, Xalq artisti Siyavuş Kərimi Qara Qarayev musiqisinin daim yaşayacağını diqqətə çatdıraraq, onun yaradıcılığının mədəniyyətimizdə hər zaman xüsusi yerə malik olduğunu vurğulayıb. O, Azərbaycan musiqisinə böyük töhfələr vermiş dahidir. Görkəmli bəstəkarın əsərləri bu gün də dünya səhnələrində səslənməklə mükəmməlliyini bir daha sübut edir.